Prezident İlham Əliyev və xanımı Mehriban Əliyeva cənub bölgəsində səfərdə olublar - VİDEO

Prezident İlham Əliyev və birinci xanım Mehriban Əliyeva cənub bölgəsində səfərdə olublar.

Carci.tv məlumatına görə, Lənkəran, Astara və Lerik rayonlarında olan dövlət başçısı və xanımı bir sıra açılış mərasimlərində iştirak ediblər.

Prezident İlham Əliyev və birinci xanım Mehriban Əliyeva əvvəlcə Lənkəranda Heydər Əliyev xatirə parkında ulu öndərin yeni ucaldılan abidəsini ziyarət edib. Sonra Lənkəranın Haftoni qəsəbəsində inşası yenicə başa çatan Lənkəran İstisu və sağlamlıq mərkəzinin təqdimatı olub. Təxminən 11 hektar sahəsi olan kompleksdə otel, tibb mərkəzi və müxtəlif termal hamamlar fəaliyyət göstərəcək. Mərkəzin 182 nömrəlik otel binası ən yüksək standartlar səviyyəsində inşa olunub. Komplekslə tanışlıqdan sonra Prezident İlham Əliyev və birinci xanım Mehriban Əliyeva rayon ictimaiyyətinin nümayəndələri, müəssisənin kollektivi ilə görüşüblər. Sonda xatirə şəkli çəkdirilib.

Prezident və xanımı Lənkəran Olimpiya İdman Kompleksinin açılışında da iştirak ediblər. Ümumi ərazisi 6 hektar olan idman qurğusunda bütün zəruri infrastruktur yaradılıb. Bu, ölkəmizdə idmançıların ixtiyarına verilən sayca 44-cü Olimpiya İdman Kompleksidir.

Sonra "Azərxalça" Açıq Səhmdar Cəmiyyətinin Lənkəran filialının açılışı olub. Burada 150 toxucu və 13 inzibati-təsərrüfat işçisinin çalışması nəzərdə tutulub. Bina toxuculuq emalatxanası, rəssam otağı, anbar, yeməkxana, tibb otağı, xalça satışı salonu və digər bölmələrdən ibarətdir.

Lənkərana səfərləri çərçivəsində Prezident və xanımı Hirkan-Daştatük-Biləsər avtomobil yolunun yenidənqurmadan sonra açılışında iştirak ediblər. 7 yaşayış məntəqəsini biləşdirən yolun uzunluğu 22 kilometrdir. Dövlət başçısına Astara rayonunun Ojakəran-Tüləküvan-Təngərüd avtomobil yolunun tikintisi barədə də məlumat verilib. 9 min nəfər əhalinin yaşadığı 3 yaşayış məntəqəsini birləşdirən bu yolun uzunluğu 11 kilometrdir.

Dövlət başçısı Astara rayonunun Taxtanəkəran-Miki, Taxtanəkəran-Toradi kəndlərarası avtomobil yollarının tikintisi ilə də maraqlanıb.

Prezident İlham Əliyev və xanımına Astaraçay üzərində tikiləcək körpü və körpüyə qədər olan yolun planı barədə də məlumat verilib.

Sonra Astaraya gələn Prezident İlham Əliyev burada "Astara şəhərinin içməli su təchizatı sistemləri" layihəsinin başa çatması münasibətilə keçirilən mərasimdə iştirak edib. Bu layihə Astara şəhərində 28,5 min nəfərin içməli su və kanalizasiya xidmətlərindən istifadəsinin yaxşılaşdırılmasına hesablanıb. Gələcəkdə rayonda 73 min nəfərin yaşadığı 27 kəndə də içməli suyun verilməsi nəzərdə tutulur. Ümumilikdə, bu layihədən 102 min sakin faydalanacaq. Dövlət başçısı Astara şəhərinin içməli su təchizatı və kanalizasiya sistemlərinin rəmzi açılışını bildirən düyməni basıb.

Prezident İlham Əliyev Astarada dənizkənarı park-bulvar kompleksinin ikinci hissəsinin tikintisi çərçivəsində yaradılan şəraitlə tanış olub. Park-bulvar kompleksinin ikinci hissəsinin ərazisi 10 hektar sahəni əhatə edir. Bu istirahət məkanının 500 metrlik hissəsi Xəzər dənizinin sahili boyunca uzanır. Ərazidə 52 metr hündürlüyündə dövlət bayrağı ucaldılıb, qala divarı, fəvvarə kompleksi, süni şəlalə quraşdırılıb. Bundan başqa, istirahət məkanında iki hektar sahəsi olan "Zirvə" idman klubuna məxsus atçılıq mərkəzi, avtokartinq meydançası, açıq fitnes meydançası tikilib, velosiped zolağı salınıb.

Daha sonra Lerikə gələn dövlət başçısı, burada ümummilli lider Heydər Əliyevin şəhərin mərkəzində ucaldılmış abidəsi önünə gül dəstələri qoyub. Prezident İlham Əliyev Lerik rayonunun Piran-Hamarat-Vijaker avtomobil yolunun yenidənqurmadan sonra açılışında iştirak edib. Ümumi uzunluğu 26 kilometr olan yol 9100 nəfərin yaşadığı 28 yaşayış məntəqəsini birləşdirir. Dövlət başçısına Lerik rayonunun Noda-Şingədulan-Xanagah avtomobil yolunun tikintisi barədə də məlumat verilib. Ümumi uzunluğu 36 kilometr, eni 6 metr olan bu yolun tikilməsi bölgədə sərnişin və yük daşınmasını xeyli yaxşılaşdırmağa imkan verəcək.

Dövlət başçısı "Lerik şəhərinin içməli su təchizatı sisteminin yenidən qurulması və ilk dəfə olaraq kanalizasiya şəbəkəsinin yaradılması" layihəsinin icrasının yekunlaşması münasibətilə keçirilən mərasimdə də iştirak edib. Bu layihə çərçivəsində Lerik şəhərində içməli su şəbəkəsinin və sutəmizləyici qurğunun, çirkab suların şəhər ərazisindən kənarlaşdırılması üçün kanalizasiya şəbəkəsinin və çirkab sutəmizləyici qurğunun tikintisi nəzərdə tutulub. Prezident İlham Əliyev Lerik şəhərinə içməli suyun verilməsini bildirən düyməni basıb.

Prezident İlham Əliyev həmçinin, Lerik rayonunda gücü 16,5 MVt olan elektrik stansiyasının istismara verilməsi mərasimində iştirak edib. Elektrik stansiyası Lerik şəhər mərkəzindən bir kilometr cənubda, Cəngəmiran kəndində 3,6 hektar ərazidə yerləşir. Burada hər birinin gücü 3,3 MVt olan beş mühərrik-generator, həmçinin 35 kV və 10 kV-luq yarımstansiyalar quraşdırılıb.

Bu gün Lerikdə Bayraq Muzeyi də istifadəyə verilib. Prezident İlham Əliyev açılışda iştirak edib və muzeyin rəmzi açılışını bildirən lenti kəsib. Qeyd edilib ki, Bayraq Muzeyi və hündürlüyü 36 metr olan bayraq dirəyinin yerləşdiyi Dövlət Bayrağı Kompleksi Lerik şəhərinin mərkəzində, ümummilli lider Heydər Əliyevin adını daşıyan meydanın ərazisində yerləşir.

Prezident İlham Əliyev Heydər Əliyev Fondunun təşəbbüsü ilə inşa olunmuş 100 yerlik Lerik şəhər 2 saylı körpələr evi-uşaq bağçasının açılışında da iştirak edib. Müəssisədə 22 nəfərin daimi işlə təmin edilməsi nəzərdə tutulub.

Xezerxeber.az mövzu ilə bağlı daha ətraflı videomaterialı təqdim edir: