Türk dünyasının mədəniyyət paytaxtı Şuşada keçirilən qurultay tarixi hadisə oldu

Türk dünyasının mədəniyyət paytaxtı Şuşada keçirilən qurultay tarixi hadisə oldu

 

Bu günlər dünyanın diqqəti Azərbaycanın döyünən ürəyi, Türk dünyasının mədəniyyət paytaxtı Şuşaya yönəldi. Tarixi Zəfərimizdən sonra keçirilən Dünya Azərbaycanlılarının V Qurultayı tarixə Zəfər Qurultayı kimi daxil oldu. Dövlətimizin başçısı, Müzəffər Ali Baş Komandan cənab İlham Əliyev dünya azərbaycanlılarının qarşısında çıxış edərək Qələbəmizə gedən yola, Azərbaycanın 44 günlük Qarabağ müharibəsində göstərdiyi qəhrəmanlığa, şücaətə, postmünaqişə dövrünün reallıqlarına, eyni zamanda diasporumuzun ötən illər ərzində təşkilatlanması, vahid məqsəd uğrunda mübarizə aparması istiqamətində atılan addımlara, həqiqətlərimizin dünya ictimaiyyətinə çatdırılmasına verdiyi töhfələrə nəzər salaraq qarşıdakı dövrün prioritetlərini açıqladı. Bildirdi ki, əsas hədəf Zəfərimizin reallıqlarını dünya ictimaiyyətinə çatdırmaqdır. Bunun üçün səfirliklər, diaspor təşkilatlarının daha səylə çalışmalarına çağırışlar edildi.

30 ildən sonra Şuşanın dünya azərbaycanlılarını bir araya gətirməsi, buradan Ermənistana və ona havadarlıq edən dövlətlərə bir daha  mesajların ünvanlanması Azərbaycan dövlətinin qətiyyətinin, ordumuzun gücünün, xalqımızın birliyinin, həmrəyliyinin sayəsində yazılan tarixin nəticəsidir. Müzəffər Ali Baş Komandan bir daha bildirdi ki, 44 günlük müharibədə tarixi Zəfərdən sonra dünya azərbaycanlılarının qurultayının Şuşada keçirilməsinin tarixi əhəmiyyəti və rəmzi mənası var.

Zəfər Qurultayında Prezident İlham Əliyev Azərbaycan diasporunun qarşısında duran vəzifələrdən danışaraq dedi: "Diaspor təşkilatları, bütün fəallar yeni reallıqları dünya ictimaiyyətinə çatdırmalıdırlar. Xaricdə yaşayan azərbaycanlıların bu sahədə imkanları daha genişdir. Azərbaycanlılar yaşadıqları ölkələrin ictimaiyyətini maarifləndirməli, Qarabağın, Zəngəzurun tarixini, Kürəkçay, Gülüstan, Türkmənçay sülh müqavilələrinin mahiyyətini, Dağlıq Qarabağ Muxtar Vilayətinin yaranması, 1940-1950-ci illərdə azərbaycanlıların Ermənistandan kütləvi deportasiyası barədə həqiqətləri, Azərbaycan reallıqlarını, postmünaqişə dövrünün gerçəkliklərini onlara çatdırmalıdırlar".

 Bu gün Azərbaycan diasporunun qarşısında böyük vəzifələr dayanır. Diaspor təşkilatları azərbaycançılıq məfkurəsi əsasında daha sıx birləşməli, sosial şəbəkələrdə fəallığı artırmalı, erməni təbliğatının qarşısı qətiyyətlə alınmalıdır.

Natiq BAĞIROV,

Belarus Azərbaycanlıları Konqresinin sədri, "Şöhrət" ordenli.