QƏLƏBƏ STRATEGİYASI

CANLI TV / 13.03.2023 09:58

Qələbə
strategiyası

Prezident: "Biz müdafiə olunmalı yox, siyasi cəhətdən, təbliğat baxımından hücum etməliyik"

44 gün... Vətən müharibəsi və Böyük Zəfər... Bu qələbə Azərbaycan tarixinin ən parlaq səhifəsidir. Qarabağ zəfərinə doğru Azərbaycan addım-addım gəldi, çox çətinlikləri, maneələri aşdı. Bunu Azərbaycan Ordusu Ali Baş Komandan İlham Əliyevin liderliyi altında etdi! Qürur və şərəf dolu o 44 günə qədər hansı miqyasda işlərin aparıldığına tarix özü şahidlik edir.

Dövlət başçısı seçildiyi ilk gündən Azərbaycan Prezidenti qədim Qarabağın azad olunmasını prioritet hədəf seçdi. Elə 2003-cü ilin oktyabrında Prezident kimi and içdiyi gündən məhz torpaqların qeyd-şərtsiz azad olunmasının vacibliyini vurğuladı.

Vətən müharibəsində qələbəyə aparan yol 44 gün çəksə də bu Zəfərin arxasında Prezidentin illərlə yorulmadan, səbrlə, əzmlə apardığı mübarizə dayanır. Bu onun istər ölkədaxili, istər də xaricdə keçiridyi bütün görüşlərdə, beynəlxalq kürsülərdəki çıxışlarının əsas məğzini təşkil edirdi. Prezident hər kəlməsində mövqeyinin dəyişməz olduğunu göstərirdi. Düz 18 il əvvəl deyilən sözlər, verilən vədlər sonadək də dəyişməz qaldı! Qarabağ azad olunmalıdır!

Azərbaycan heç vaxt bu vəziyyətlə, torpaqlarının işğal altında qalması ilə barışmayacaq. Hamı bilməlidir ki, sülh tərəfdarı olmağımıza baxmayaraq, müharibənin yenidən başlanmamasını və bu məsələnin sülh yolu ilə həllini istəməyimizə baxmayaraq, bizim səbrimiz də tükənməz deyil. Azərbaycan öz doğma torpaqlarını nəyin bahasına olursa-olsun azad edəcək.

Andiçmə mərasimində çıxış, 31 oktyabr 2003

Prezident bilirdi ki, bu problemi həll etmək üçün ilk əvvəl beynəlxalq arenanın Qarabağ hadisələrinə yanaşmasını dəyişmək, beynəlxalq hüququn kimin tərəfində olduğunu sübut etmək və sənədlərdə bunu təsbitləmək lazımdır. Dövlət başçısı kimi elə ilk xarici səfərlərindən birində də Prezident İlham Əliyev bu məsələni qaldırdı.

Bu işğalın nəticəsi kimi, bir milyondan artıq azərbaycanlı qaçqın və məcburi köçkünə çevrilib. Ermənistanın təcavüzkar olması BMT-nin 4 qətnaməsində öz əksini tapıb. Bu barədə ATƏT-in Minsk qrupu bəyanat verib. Bu barədə Avropa Şurasının rəsmi sənədlərində qeydlər var. Beynəlxalq icma öz gücündən və nüfuzundan istifadə edib Ermənistanı məcbur etməlidir ki, Azərbaycanın işğal olunmuş ərazilərindən geri çəkilsin.

Cenevrədə İnformasiya Cəmiyyəti üzrə dünya sammiti, 10 dekabr 2003

Anlamaq lazımdır ki, biz Qarabağın müstəqilliyini və ya onun Ermənistana birləşdirilməsini heç vaxt qəbul etməyəcəyik

"Fiqaro" qəzetinə müsahibə, 22 yanvar 2004

Dövlət başçısı 17 il əvvəl Ermənistanın iflasa məruz qalacağını açıq-aydın sezmişdi. Bunu açıq deməklə qonşuları düzgün yola çağırmağa çalışırdı. Yəni uduzan siz olacaqsınız, biz isə yalnız irəli gedəcəyik.

"Elə görünə bilər ki, Ermənistanın mövqeləri daha əlverişlidir. Amma əslində, belə deyil. Bu gün Ermənistanla Azərbaycanı müqayisə etsək, hər bir kəs fərqi görə bilər. Azərbaycan tam müstəqil ölkədir. Ərazisində heç bir xarici dövlətin hərbi bazası yoxdur. Xarici yardımdan asılı deyil. Azərbaycan iqtisadiyyatını inkişaf etdirir. Büdcəmiz Ermənistanın büdcəsindən 3 dəfə çoxdur. Coğrafi-strateji mövqeyini və ölkədə neft sektorunun inkişafını nəzərə alsaq, Azərbaycan qısa zaman kəsiyində çox güclü ölkəyə çevriləcək. Ermənistana nəzər salsaq, görərik ki, bu deyilənlərə yaxın heç bir şey yoxdur"

Fransanın "Fiqaro" qəzetinə müsahibə, 22 yanvar 2004

Azərbaycanın mövqeyi ədalətlidir, vaxt bizə işləyir və beynəlxalq hüquq da bizim tərəfimizdədir. Digər tərəf bunu nə qədər tez başa düşərsə, bu onlar üçün yaxşı olar.

Fransa Beynəlxalq Əlaqələr İnstitutunda görüş, 23 yanvar 2004

Prezident hədəfə doğru ilk addımlara başladıqda belə artıq nəyi necə edəcəyi
barədə dəqiq planları vardı. Avropa Şurası qarşısında müharibə etməmək kimi
öhdəlik də buna mane ola bilməzdi.

Belə bir öhdəlik var və bu öhdəliyi Azərbaycan və Ermənistan hökumətləri, eyni zamanda, bu ölkələrdə fəaliyyət göstərən bütün siyasi partiyalar da öz üzərinə götürmüşdülər. Bu həqiqətdir və ölkələrimizin Avropa Şurasına qəbul olunması üçün şərt idi.

Bizim də mövqeyimiz belədir və dəfələrlə bildirmişik, biz məsələni sülh yolu ilə həll etmək niyyətindəyik. Amma, əlbəttə, bunun müəyyən müddəti olmalıdır. Yəni biz istəməzdik ki, bu proses əbədi xarakter daşısın. Hər bir danışıqların aparılmasının həddi var.

Binə beynəlxalq hava limanında jurnalistlərə müsahibə, 1 mart 2004

O illərdə Ermənistanla sərhədi açmaq üçün Türkiyəyə böyük təzyiqlər var idi. Həmin dövrdə də Azərbaycanın yanında olan qardaş ölkə qətiyyəti ilə bunun qarşısını aldı.

Mən Baş nazir vəzifəsində işləyərkən Ankarada cənab Ərdoğanla bu barədə söhbətim olub. Baş nazir cənab Ərdoğan məni bir daha əmin etmişdi ki, Türkiyə Ermənistanla sərhədlərini Dağlıq Qarabağ məsələsi həll olunmayana qədər heç vaxt açmayacaq.

Mənim üçün bu kifayətdir. Yəni əgər mən bu sözü eşitmişəmsə, mənə hər hansı başqa izahat lazım deyil.

Heydər Əliyev adına hava limanında jurnalistlərə müsahibə,
24 mart 2004

Dövlət başçısı kimi Ermənistanla danışıqlara başlayanda Prezident İlham Əliyev nəticəyə yönələn addımların atılmasını tələb edirdi. Bu onun prinsipial mövqeyi idi.

Danışıqlar yalnız razılaşdırılmış mövzu ətrafında aparıla bilər. Danışıqların mövzusu yoxdursa, biz danışıqlar aparmaq görüntüsü yaratmaq fikrində deyilik. Azərbaycan görsə ki, danışıqlar prosesi lazımsızdır, onda yəqin ki, bu siyasətimizə yenidən baxmalı olacağıq

AŞPA-nın yaz sessiyasının iclasında çıxış, 29 aprel 2004

Bu gün dillər əzbəri olan "Qarabağ Azərbaycandır!" kəlməsinin deyildiyi tarix də var. Prezident düz 17 il əvvəl demişdi bu kəlməni... O bunu beynəlxalq arenada səsləndirərək Ermənistana və onu müdafiə edənlərə dəqiq mesaj vermişdi.

Azərbaycanın mövqeyi aydındır və dəfələrlə bəyan edilib. Bu bəyanatlarla indiyədək tanış olmağa imkanınız olmayıbsa, mən sizin yadınıza salım: Dağlıq Qarabağ Azərbaycanın ərazisidir. Azərbaycan heç vaxt Dağlıq Qarabağın müstəqilliyinə, yaxud Ermənistanın bir hissəsi olmasına razılıq verməyəcək. Dağlıq Qarabağ Azərbaycanındır.

Avropa sarayında mətbuat konfransı, Strasburq, 29 aprel 2004

Prezident sülh danışıqlarından imtina etmədən müharibə variantını daim diqqətdə saxlayırdı. Bilirdi ki, Ermənistan onsuz da işğaldan geri çəkilməyəcək. Dövlət başçısı olduğu ilk günlərdən müasir ordu quruculuğu daha da sürətləndi.

Mən bəyan edirəm ki, orduya xərclənən vəsait bundan sonra artacaq, biz ordumuzun maddi-texniki bazasını daha da gücləndirməliyik. Bütün bunları etmək üçün bizdə imkanlar var

Bəzən səslər eşidilir ki, bu məsələdə kompromis olmalıdır. Bu məsələdə, torpaq məsələsində heç bir kompromisdən söhbət gedə bilməz. Bunu qarşı tərəf nə qədər tez anlasa, o qədər də yaxşı olacaq.

Gəncədəki "N" saylı hərbi hissəsinin şəxsi heyəti ilə görüş, 18 iyun 2004

Prezident hələ 17 il əvvəl müharibə olarsa, qələbə üçün xalqın birləşməsini ən əsas amil hesab edirdi. Doğurdan da bunun nə qədər önəmli olduğuna biz Vətən müharibəsi dövründə şahid olduq.

Bunu etmək üçün bir neçə amillər lazımdır və bunların da hamısı, demək olar, Azərbaycanda var. Vətənpərvərlik ruhu çox yüksək səviyyədədir. Mən çox istəyirəm ki, bizim gənc nəslimiz məhz vətənpərvərlik ruhunda tərbiyə edilsin. Azərbaycanda milli vətənpərvərlik var.

Bərdə rayonunda məskunlaşmış məcburi köçkünlərlə görüş, 11 sentyabr 2004

Prezident ata-baba torpaqlarından didərgin düşmüş məcburi köçkünlərlə tez-tez görüşürdü və onların yaşayış şəraitinin yaxşılaşdırılması üçün yeni evlər və binalar tikilməsinə göstərişlər verirdi. Eyni zamnada dövlət başçısı əmin idi ki, torpaqlar azad ediləcək və məcburi köçkünlər öz yurdlarına qayıdacaqlar. Prezident bunu hər görüşündə böyük ümid və inamla deyirdi!

Mən heç şübhə etmirəm ki, ən çətin problemə - Ermənistanın Azərbaycan torpaqlarını işğal altında saxlamasına son qoyulacaq, bu məsələni müsbət həll edəcəyik. Azərbaycan xalqı birdir, bu məsələni həll edəcək. Siz öz doğma torpaqlarınıza qayıdacaqsınız, mən də gələcəyəm, sizinlə birlikdə orada olacağam.

Bərdə rayonunda məskunlaşmış məcburi köçkünlərlə görüş, 11 sentyabr 2004

Əsas məsələlər, əsas böyük işlər torpaqlarımız işğaldan azad olunandan sonra başlayacaq. Bayaq qeyd etdiyim kimi, işğal edilmiş bütün ərazilərdə, bütün infrastrukturlar dağıdılıb. Biz yeni şəhərlər tikəcəyik, yeni qəsəbələr, kəndlər yaradacağıq və buna hazır olmalıyıq. Onu da bilirik ki, biz ancaq öz gücümüzə arxalana, ancaq öz gücümüzə istinad edə bilərik.

Ağdam rayonu, 18 yanvar 2007

Prezident daim Şuşa haqqında düşünürdü. Çıxışlarının əksəriyyətində də Şuşanı azad etməliyik, Şuşaya qayıtmalıyıq deyirdi. Halbuki bəlkə də çoxlarında o ümidlər sönmüşdü, amma Prezident buna əmin idi və inanırdı. Həmçinin dövlət başçısı Zəngəzurun əzəli və əbədi Azərbaycan torpağı olduğunu dönə-dönə vurğulayırdı.

Mən nəyi demişəmsə, onun üstündə durmuşam və duracağam. Bir sözlə, həm 7 rayon qeyd-şərtsiz qaytarılmalıdır, eyni zamanda, azərbaycanlılar Dağlıq Qarabağa, o cümlədən Şuşaya qayıtmalıdırlar.

Bakının Sabunçu rayonunda məcburi köçkünlər üçün tikilmiş yeni qəsəbənin açılışı, 4 may 2007

Hamı yaxşı bilir ki, indiki Ermənistan əzəli Azərbaycan torpaqlarında yaradılıb. İrəvan xanlığı, Zəngəzur mahalı - bütün bunlar Azərbaycan torpaqlarıdır.

Goranboy rayonu, 20 noyabr 2009

Ermənistan danışıqları pozmaq üçün getdikcə açıq təxribatlar törədirdi. Bir çox hallarda bu, təmas xəttində toqquşmalara səbəb olurdu. "Vur, komandir!" sözləri hamının yadındadır. Birinci Qarabağ müharibəsindən sonra ilk dəfə idi Ermənistanın hərbi helikopteri məhv edilmişdi. Sonra isə 2016-cı ilin aprel müharibəsi... Azərbaycan o zaman nə qədər güclü olduğunu göstərdi.

Təmas xəttində gərginliyi azaltmaq barədə razılığa gəldiyimiz Paris görüşündən iki həftə keçməmiş Ermənistan işğal olunmuş Ağdam rayonunda, onların özlərinin verdiyi məlumata görə 47 min hərbi qulluqçunun iştirakı ilə genişmiqyaslı təlimlər keçirdi. Buna lüzum yox idi. Bu, danışıqlar prosesini pozmağa yönəlmiş açıq-aşkar təxribat idi. Biz bir neçə gün təmkinlilik göstərdik və göstəriş verdik ki, bu təxribata reaksiya verilməsin. Çünki biz hesab edirdik ki, gərginlik azaldılmalıdır. Lakin qarşı tərəf Mİ-24 döyüş helikopterləri ilə mövqelərimizə hücum etməyə cəhd göstərdi. Bizim tərəfin cavab tədbirləri nəticəsində helikopterlərdən biri məhv edildi.

"Rossiya-24" telekanalına müsahibə, 3 may 2015

Biz öz torpağımızda vuruşuruq. Əgər erməni əsgəri ölmək istəmirsə, Azərbaycan torpağından rədd olsun

Təhlükəsizlik Şurasının iclası, 2 aprel 2016

"Qarabağ Azərbaycandır və nida işarəsi"... Prezidentin bu sözləri bütün Azərbaycanda dillər əzbəri oldu. Bu həm də Qarabağın azadlığı uğrunda aparılan savaşın devizinə çevrildi. "Qarabağ Azərbaycandır!", deyərək qəhrəman əsgərlərimiz ya olum, ya ölüm savaşına atıldılar!

Bəyanat sözbəsöz belədir: "Qarabağ Ermənistanın bir hissəsidir və nöqtə". Birincisi, yumşaq desək, bu, yalandır. Dünya tərəfindən həm Aran, həm də Dağlıq Qarabağ Azərbaycanın ayrılmaz hissəsi kimi tanınıb. Ermənistan özü də bu qanunsuz qurumu tanımır. Qarabağ tarixi, əzəli Azərbaycan torpağıdır. Beləliklə, Qarabağ Azərbaycandır və nida işarəsi.

Soçidə "Valday" Beynəlxalq Diskussiya Klubunun XVI illik iclası, 3 oktyabr 2019

Onlar hesab edirdilər ki, biz bu təhqirlə barışacağıq, razılaşacağıq. Onlar bizi şüurlu şəkildə təxribatlara çəkirlər və bunun acı nəticələrini görəcəklər.

Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!

Xalqa müraciət, 27 sentyabr 2020

İşğal edilmiş torpaqların hər bir qarışı, hər bir şəhər bizim üçün doğmadır, əzizdir. Mənim üçün hər bir kəndin dəyəri, qiyməti o biri kəndlə müqayisədə, o biri şəhərlə müqayisədə eynidir, bərabərdir. Ancaq siz də yaxşı bilirsiniz ki, Şuşanın Azərbaycan xalqının qəlbində xüsusi yeri var. Bu bizim tarixi şəhərimizdir, qədim mədəniyyət ocağıdır. Şuşa Azərbaycan xalqına bir çox istedadlı, dahi şəxslər bəxş edib. Əlbəttə ki, Şuşasız bizim işimiz yarımçıq olar.

"A Haber" televiziya kanalına müsahibə, 16 oktyabr 2020

Bu tarixi bir gündə Azərbaycan xalqına bu müjdəni vermək mənim həyatımda bəlkə də ən xoşbəxt günlərimdən biridir. Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik! Şuşa bizimdir! Qarabağ bizimdir! Qarabağ Azərbaycandır!

Şəhidlər xiyabanında Azərbaycan xalqına müraciət, 8 noyabr 2020

Mən bu gün, eyni zamanda, ulu öndər Heydər Əliyevin məzarını ziyarət etdim, onun ruhu qarşısında baş əydim. Ürəyimdə dedim, xoşbəxt adamam ki, ata vəsiyyətini yerinə yetirdim. Şuşanı azad etdik! Bu, böyük Qələbədir! Şəhidlərimizin, Ulu Öndərin ruhu şaddır bu gün! Gözün aydın olsun Azərbaycan! Gözünüz aydın olsun dünya azərbaycanlıları!

Şəhidlər xiyabanında Azərbaycan xalqına müraciət, 8 noyabr 2020

2020-ci il Azərbaycan üçün unudulmaz oldu. Hamı üçün xəyal kimi görünən o tarixi gün gəldi! Azərbaycan Ordusu Ali Baş Komandanın rəhbərliyi ilə düşmənin zəbt etdiyi şəhər və kəndlərimizi bir-bir azad etdi. Prezidentin illər öncə dedikləri bir-bir reallaşdı. Ən yaxın tarixə qısa bir nəzər salmaqla bu Zəfərin Prezident İlham Əliyevin incəliklərinə qədər düşünülmüş strateji planı olduğunu görmək mümkündür!

XXI əsrin ən güclü ordusunu yaradaraq, Böyük Zəfərə İmza atan Müzəffər Ali Baş Komandan!