Prezident İlham Əliyev Hacı Cavad məscidinin açılışında iştirak edib - VİDEO

CANLI TV / 13.04.2018 00:04

Bu gün pezident İlham Əliyev və birinci xanım Mehriban Əliyeva Yasamal rayonu, Abbas Mirzə Şərifzadə küçəsi 1 ünvanında inşa edilən Hacı Cavad Məscidinin açılışını ediblər.

Yasamal rayon İcra Hakimiyyətinin başçısı Əziz Əzizov prezidentə görülən işlər barədə məlumat verərək bildirib ki, məscidin yeni binası 1200 kvadratmetr ərazini əhatə edir. Yalnız ibadət zalının sahəsi 400 kvadratmetrə yaxındır. Milli memarlıq üslubunda inşa olunan ibadət evinin günbəzinin hündürlüyü 18, minarənin hündürlüyü isə 33,7 metrdir. Eyni vaxtda 500-dən çox insanın ibadət edə biləcəyi məscidin birinci mərtəbəsi kişilər, ikinci mərtəbəsi isə qadınlar üçün nəzərdə tutulub. Dövlət başçısı Hacı Cavad dini icmasının üzvləri ilə də görüşüb.

Prezident İlham Əliyev Azərbaycanda məscidlərin tikintisinə xüsusi diqqət ayrıldığını və tarixi məscidlərimizin dövlət hesabına əsaslı şəkildə təmir edildiyini bildirib.

Açılış mərasimində Hacı Cavad dini icmasının üzvləri prezident İlham Əliyevə Qurani-kərim kitabı hədiyyə edib.

Qeyd edək ki, prezident İlham Əliyevin tapşırığı ilə Hacı Cavad məscidinin yeni binasının tikintisinə 2017-ci ilin iyulun 2-ə başlanılıb.

Xezerxeber.az mövzu ilə bağlı daha ətraflı videomaterialı təqdim edir: